Выстава “Правiнцыя” Кастуся Качана ўскалыхнула культурнае жыццё беларускай сталіцы
Выстава “Правiнцыя” выдатнага беларускага мастака Кастуся Качана з поспехам прайшла ў карцiннай галерэi Мiхаiла Савiцкага ў Мінску з 25 красавiка па 20 мая 2018 года.
Якія сэнсы несла ў сабе гэтая экспазіцыя? Што адметнага і самабытнага было ў ёй?
Пра гэта, а таксама ў цэлым пра творчасць песняра беларускіх мястэчак Кастуся Качана змястоўна і глыбока распавяла мастацтвазаўца Наталля Сяліцкая:
“Кастусь Качан – мастак ад зямлі, ад народа. Валодаючы ад прыроды рэдкім талентам каларыста, беспамылковым пачуццём кампазіцыі і малюнка, імкненнем складаць у сваіх творах паэтычны вобраз беларускай прыроды, а таксама велізарнай працавітасцю, Кастусь Качан здолеў стаць высокапрафесійным жывапісцам, чыя творчасць адзначана глыбока нацыянальным характарам.
Радзімай жывапісца з’яўляецца ціхая, утульная беларуская правінцыя, любоў да якой ён захаваў і па сённяшні дзень. Адсюль і прыярытэты ў яго мастацтве, сярод якіх – упадабаная тэма жыцця малых гарадоў і мястэчак з вялікай тысячагадовай гісторыяй.
Сюжэты карцін, прадстаўленых на выставе, на першы погляд, простыя і непатрабавальныя – рэкі, дрэвы, палі і жывёлы, дамы, храмы і закінутыя вёскі. Аднак унутраным лейтматывам у творчасці мастака з’яўляецца тэма Вечнага і Вечнасці.
Напэўна, таму яго творы, па сутнасці, пазбаўлены прыкмет часу. Былое і сучаснасць не супрацьпастаўляюцца, не адасабляюцца адзін ад аднаго, а жывуць у прасторава-часавым адзінстве.
Яго пейзажы ствараюць гарманічную панараму суіснавання чалавека і прыроды. Жывапіс мастака, з выгляду някідкі, падпарадкаваны задачам паэтызацыі штодзённага быцця. Ён мае шчыльную, матэрыяльную, адчувальную аснову і адрозніваецца адценнямі фарбаў, якія падкрэсліваюць непаўторнасць прыгажосці беларускага края.
З’яўляючыся ў пэўнай ступені прадаўжальнікам традыцый рускай рэалістычнай школы жывапісу другой паловы XIX ст., Кастусь Качан у той жа час вельмі дакладна вызначае для сябе меру ўзаемадзеяння рэалістычнага пісьма з шэрагам знакавых вобразаў і сімвалаў, што, у сваю чаргу, ужо характарызуецца тэндэнцыямі, якія адбываюцца ў беларускім мастацтве на сучасным этапе.
Бясспрэчная каштоўнасць прадстаўленых у экспазіцыі твораў заключаецца ў тым, што ў іх выразна выяўлены прыярытэты, уласцівыя практычна ўсім карцінам мастака, – традыцыйная архітэктура, каларыт жыцця вясковага чалавека, сціплая прыгажосць беларускай прыроды”.
Нядзіўна, што ў жыхароў і гасцей Мінска выстава “Правінцыя” знайшла шырокі водклік. Сціплая прыгажосць мястэчак і беларускай прыроды ў адрозненні ад сталічнай мітусні і яркіх фарбаў прынесла наведвальнікам экспазіцыі жаданае пачуццё спакою, цішыні і гармоніі.
Фотаальбом “Выстава “Правінцыя” Кастуся Качана ў Мінску” гартайце ТУТ!
